İstanbulda leysan yağışlar fəsadlar törədib, nəqliyyatın hərəkəti dayanıb

Türkiyənin İstanbul şəhərində gecə saatlarından başlayaraq səhər saatlarında şiddətlənən güclü yağışlar şəhərdə ciddi fəsadlar törədib və daşqınlara səbəb olub.

Məlumata əsasən, xüsusilə Pendik və Tuzla rayonlarında yeraltı keçidləri su basıb. Şəhərdə nəqliyyatın hərəkətində ciddi fasilələr yaranıb, avtomobillərdə köməksiz qalan 41 nəfər təhlükəsiz əraziyə təxliyə edilib.

Türkiyə Meteorologiya Baş İdarəsi ölkə ərazisində gözlənilən təbii hadisələrlə bağlı əhaliyə xəbərdarlıq edib. Bildirilib ki, Mərmərə bölgəsi, Cənub-Şərqi Anadolu, həmçinin Antalya, Osmaniye, Tunceli, Aydın, Hatay, İzmir və Adana istiqamətlərində intensiv yağıntılar müşahidə olunacaq.

Muğla ətrafında isə daha şiddətli və həddindən artıq güclü yağışların olacağı proqnozlaşdırılır. Səlahiyyətli qurumlar qəfil daşqınlar, torpaq sürüşmələri, ildırım, dolu və güclü küləklər kimi risklərə qarşı vətəndaşları diqqətli olmağa çağırıblar.