Azərbaycanda aşağıkarbonlu inkişaf və xalis sıfır emissiya hədəfləri təsdiqləndi

Azərbaycan Respublikasında ekoloji mühitin qorunması və iqlim dəyişiklikləri ilə mübarizə istiqamətində mühüm addım atılıb. Baş nazir tərəfindən “Azərbaycanın Uzunmüddətli Aşağıkarbonlu İnkişaf Strategiyası” təsdiq olunub.

Ekologiya və Təbii Sərvətlər Nazirliyinin mətbuat katibi İradə İbrahimova bildirib ki, sənəd ölkənin iqtisadi inkişafını qorumaqla yanaşı, iqlimə mənfi təsirlərin azaldılmasını və 2060-cı ilədək xalis sıfır emissiya hədəfinə çatmağı hədəfləyir.

Strategiya çərçivəsində energetika, nəqliyyat, sənaye, kənd təsərrüfatı və digər sahələrdə mərhələli dəyişikliklər nəzərdə tutulur. Xüsusilə günəş və külək enerjisindən istifadənin artırılması, yaşıl enerji zonalarının inkişafı və enerji səmərəliliyi prioritet təşkil edir.

Sənədin beynəlxalq miqyasda da əhəmiyyətli olduğunu vurğulayan İradə İbrahimova qeyd edib ki, strategiya BMT-nin müvafiq qurumuna təqdim olunacaq və ölkənin qlobal iqlim səylərinə töhfəsini nümayiş etdirəcək.