Vladimir Putin: Ukrayna ilə bağlı danışıqları bərpa etməyə hazırıq

AzadAzərbaycan xəbər verir ki, Rusiya Federasiyasının Prezidenti Vladimir Putin rəsmi Moskvanın Ukrayna məsələsi üzrə üçtərəfli danışıqlar prosesinə qayıtmaq niyyətində olduğunu açıqlayıb.

Rusiya dövlət başçısının sözlərinə əsasən, bu diplomatik təmasların əsas qayəsi birdəfəlik sülhə qovuşmaq və hər iki dövlətin gələcək təhlükəsizliyini təmin edəcək razılaşmalar əldə etməkdir. Putin qeyd edib ki, bu addım sadəcə hərbi toqquşmaların müvəqqəti dayandırılması yox, hərtərəfli və yekun saziş formasında reallaşmalıdır.

Kreml rəhbəri Ukrayna ilə müharibə etmək arzusunda olmadıqlarını iddia edərək hazırkı vəziyyətdən çıxış yollarını tapmağa hazır olduqlarını bildirib. O əlavə edib ki, Ukrayna rəhbərliyi döyüşmək istəyirsə, bu onların seçimidir, lakin başqalarının bunun xərcini qarşılaması və silah göndərməsi ədalətli deyil.

Həmçinin Putin Rusiya ilə Ukraynanın təhlükəsizlik məsələsinin Avropanın ümumi təhlükəsizlik sistemi ilə birgə nəzərdən keçirilməsinin vacibliyini vurğulayıb. O, tərəflərin ümumi dil tapa biləcəyinə inandığını, lakin razılıq əldə olunmayacağı təqdirdə ölkəsinin qarşıya qoyduğu bütün hərbi hədəflərə çatacağını qeyd edib.