Müşfiq Ələsgərli rəqəmsal mediada özünütənzimləmə mexanizmlərinin vacibliyini vurğulayıb

Azərbaycan Mətbuat Şurasının İdarə Heyətinin üzvü, media sahəsi üzrə ekspert Müşfiq Ələsgərli “Milli mətbuatdan rəqəmsal mediaya: keçid və yeni dövrün çağırışları” adı altında təşkil olunan forumda çıxış edib.

Ekspert öz çıxışında qeyd edib ki, beynəlxalq təcrübədə medianın özünütənzimləmə prinsipi etik kodekslər, onların icrasına nəzarət mexanizmləri və media ombudsmanı vasitəsilə həyata keçirilir. O, Mətbuat Şurasının bu sahədəki fəaliyyətinə toxunaraq, “Azərbaycan Jurnalistlərinin Etik Davranış Qaydaları”na riayət edilməsinin önəmini xatırladıb. M.Ələsgərli həm ənənəvi, həm də rəqəmsal mühitdə özünütənzimləməyə ehtiyac duyulduğunu diqqətə çatdırıb.

Peşəkar media ilə sosial şəbəkə fəaliyyəti arasındakı fərqləri qeyd edən ekspert bildirib ki, jurnalistlərin üzərinə düşən əsas öhdəlik ictimaiyyət üçün əhəmiyyətli məlumatı tapmaq, emal etmək və təqdim etməkdir. Sosial media istifadəçilərinin isə belə bir məsuliyyəti yoxdur.

Çıxışın sonunda M.Ələsgərli xəbər başlıqlarında süni sensasiya yaradılmasının və sərlövhənin mətnin məzmununa uyğun gəlməməsinin yolverilməz olduğunu bildirərək, bu cür halların cəmiyyəti dezinformasiyaya yönləndirdiyini əlavə edib.