Ceyhun Bayramov TDT-nin BMT-də müşahidəçi statusu alması üçün дипломатик səyləri artırmağa çağırıb

Ankarada Türk Dövlətləri Təşkilatının (TDT) Xarici İşlər Nazirləri Şurasının iclasında iştirak edən Azərbaycanın xarici işlər naziri Ceyhun Bayramov geniş nitq ilə çıxış edib. Nazir ilk növbədə qardaş Türkiyə xalqını Cümhuriyyətin 103-cü ildönümü münasibətilə təbrik edib.

Ceyhun Bayramov diqqətə çatdırıb ki, iqtisadi və nəqliyyat əlaqələrinin genişləndirilməsi, institusional səmərəliliyin yüksəldilməsi, eləcə də ortaq tarixi-mədəni irsin qorunması Azərbaycanın TDT-yə sədrliyinin əsas prioritetləri sırasındadır. Mürəkkəb qlobal təhlükəsizlik mühitində təşkilat üzvləri arasında qarşılıqlı etimadın və həmrəyliyin möhkəmləndirilməsi xüsusi əhəmiyyət kəsb edir.

Xarici işlər naziri 2027-ci ilə qədər birgə müdafiə sənayesi istehsalı və texnoloji əməkdaşlıq üzrə Yol Xəritəsinin qəbul edilməsinin, həmçinin ticarət, energetika, rəqəmsal inkişaf və investisiya sahələrində inteqrasiyanın dərinləşdirilməsinin vacibliyini qeyd edib. Bununla yanaşı, Türk Dünyası Həftəsi və müxtəlif humanitar layihələrin TDT məkanında birliyi daha da gücləndirdiyi vurğulanıb.

Nazir TDT-yə BMT Baş Assambleyasında müşahidəçi statusunun qazandırılması üçün Nyu-Yorkda diplomatik fəallığın artırılmasının vacibliyini diqqətə çatdırıb. O, həmçinin xarici tərəfdaşlarla əlaqələri genişləndirən TDT+ formatının önəmini xatırladaraq Azərbaycanın təşkilat daxilində səmərəli əməkdaşlığın inkişafına töhfə verməyə davam edəcəyini bildirib.