İngiltərədə minlərlə köhnə soyuducu dağ yamacına atıldı

İngiltərənin Norfok bölgəsindəki təkrar emal sektorunda yaranan böhran nəticəsində 3 mindən çox köhnə soyuducu və dondurucu dağ yamacına atılaraq süni təpə əmələ gətirib. Məişət texnikasından ibarət bu qeyri-adi dağın görüntüləri yerli sakinlər tərəfindən sərt narazılıqla qarşılanıb.

Aparılan araşdırmalara görə, təkcə Norfokda 3 mindən çox soyuducu toplandığı halda, Uelsin Nyuport şəhərində bu göstərici 80 minə çatıb. Ölkə daxilindəki təkrar emal mərkəzlərində baş verən yanğınlar və yaranan iqtisadi çətinliklər səbəbindən bir çox müəssisə fəaliyyətini dayandırıb, nəticədə 26 yerli özünüidarəetmə orqanı köhnə soyuducu qəbul etməkdən imtina edib.

Mütəxəssislər xəbərdarlıq edirlər ki, soyuducuları adi məişət tullantısı kimi açıq sahələrə atmaq yolverilməzdir. Köhnə modellərin soyutma sistemində istifadə olunan qazlar ozon qatını zədələyir, yeni tipli cihazlardakı maddələr isə güclü istixana effekti yaradaraq ekologiyaya ciddi ziyan vurur.

Hazırda Norfok rəhbərliyi soyuducu qəbulunu qismən bərpa etməyə çalışsa da, bölgədə fəaliyyət göstərən 19 təkrar emal mərkəzindən yalnız 7-si işləyir. Əgər lazımi təminat gücləndirilməsə, bu məişət texnikasının uzun müddət ərazidə qalacağı ehtimal olunur.