Din xadimi yadplanetlilər və UFO mövzusunun mənəvi tərəflərindən danışıb

AzadAzərbaycan xəbər verir ki, missioner Staxiy Kolotvin NASA astronavtı Çarlz Dyukun naməlum uçan obyektlərin (UFO) mənşəyi ilə bağlı səsləndirdiyi fikirlərlə razılaşdığını bildirib.

Keşiş vurğulayıb ki, insan ruhu hər zaman Yaradanı axtarmağa meyllidir. Lakin daxili mənəviyyata çatmaq, günahları etiraf etmək və tövbə etmək çətin bir proses olduğu üçün bir çox insan öz nöqsanları ilə üzləşmək əvəzinə kainatın mistik sirlərinə yönəlməyi üstün tutur.

Kolotvin bu durumu saxta dərman satan fırıldaqçıların əməlləri ilə müqayisə edib. Onun fikrincə, şər qüvvələr insan ruhunun mənəvi ehtiyaclarını yalançı fenomenlərlə əvəzləyir. Əgər orta əsrlərdə diqqəti yayındıran mistik varlıqlar vampirlər və canavarlar idisə, günümüzdə bunu UFO və yadplanetli axtarışları əvəz edib.

Bununla belə, din xadimi imanın elmi inkar etmədiyini qeyd edib. O, insanların elm öyrənməsinin və biliklərini artırmasının vacibliyini, lakin bu prosesin dua və daxili təmizlənmə ilə paralel aparılmalı olduğunu bildirib. Kolotvin gələcəkdə də insanlığı əsl mənəvi yoldan yayındırmaq üçün yeni fantastik uydurmaların ortaya çıxacağını vurğulayıb.