Silvestr Stallone və Arnold Şvartseneggerin illərlə sürən düşmənçiliyindən maraqlı faktlar

AzadAzərbaycan xəbər verir ki, Hollivudun iki məşhur aktyoru Silvestr Stallone və Arnold Şvartsenegger uzun illər açıq şəkildə rəqabət aparıb və düşmənçilik ediblər. Hər iki ulduz ən böyük döyüş filmi qəhrəmanı olmaq uğrunda mübarizə apararaq filmlərdəki öldürülən düşmən sayından tutmuş qonorarlara qədər hər bir xırdalığı müqayisə edib.

İki aktyor arasında gərginlik ilk dəfə 1977-ci ildə "Qızıl Qlobus" mükafatlandırma mərasimində başlayıb. Təşkilatçıların eyni masaya əyləşdirdiyi sənətçilərdən Stallone, filmi "Rokki" qalib gəldikdən sonra seincini nümayiş etdirmək bəhanəsi ilə masadakı gül vazasını Şvartseneggerə tərəf atıb. Bu hadisə uzunmüddətli rəqabətin əsasını qoyub.

Rəqabətin ən diqqətçəkən epizodlarından biri isə 1992-ci ildə çəkilən "Dayan! Yoxsa anam atacaq" filmi ilə bağlı olub. Şvartsenegger filmin uğursuz olacağını əvvəlcədən anlayaraq roldan imtina edib, lakin hiylə işlədərək rola maraq göstərdiyini bildirib. Rəqibindən geri qalmaq istəməyən Stallone tələyə düşərək baş rola razılaşıb və nəticədə film biabırçı uğursuzluğa düçar olaraq "Ən pis aktyor" daxil olmaqla bir neçə antirekord mükafatı alıb.

Sərt rəqabət yalnız 2003-cü ildə, Şvartsenegger Kaliforniya qubernatoru seçilərək kino sahəsindən uzaqlaşdıqda səngiyib. Təsadüfi görüşlərin birində münaqişəyə son qoyan aktyorlar illərlə davam edən rəqabətin onları daha çox çalışmağa vadar etdiyini etiraf ediblər. Sonradan yaxın dost olan sənətçilər "Expendables" və "Escape Plan" kimi bir neçə birgə layihədə də rol alıblar.