Rusiyanın İrkutsk vilayətində kəskin büdcə kəsiri səbəbindən kütləvi ixtisarlar başlayıb

AzadAzərbaycan xəbər verir ki, Rusiyanın Sibir Federal Dairəsinin iqtisadi potensialına görə ikinci bölgəsi olan İrkutsk vilayətində dərinləşən büdcə çatışmazlığı səbəbindən dövlət sektorunda kütləvi ixtisarlar həyata keçirilir.

Nijneilimski bələdiyyə dairəsinin rəhbəri Pavel Berezovskinin açıqlamasına görə, ixtisarlar administrasiyadan başlayıb və ilin sonunadək bu qurumda işləyənlərin 37 faizi işini itirəcək. Bələdiyyə rəsmisi bildirib ki, yaranmış maliyyə böhranı səbəbindən xərclərin azaldılması labüddür və bu problem təkcə onların rayonunu deyil, bütün regionu əhatə edir.

İlk növbədə məktəblərdə, uşaq bağçalarında və mədəniyyət ocaqlarında gecə gözətçiləri, həmçinin kommunal xidmət müəssisələrinin əməkdaşları ixtisara düşür. Çun rayonunun sosial müəssisələrində də texniki işçilərin işdən çıxarılması prosesinə başlanılıb.

Təqdim olunan yenilənmiş büdcə layihəsinə əsasən, regionun xəzinəsindəki kəsir 38,7 milyard rubla çatıb ki, bu da ümumi xərclərin əhəmiyyətli hissəsini təşkil edir. Mövcud vəziyyət fonunda Rusiya üzrə dövlət sektorunda, o cümlədən səhiyyə və təhsil müəssisələrində çalışan minlərlə şəxs işlərini itirməkdə davam edir.