Azərbaycanda dövlət xətti ilə ipoteka kreditlərinin verilməsi şərtləri yeniləndi

Azərbaycanda ipoteka kreditlərindən mənzilə ehtiyacı olan daha çox vətəndaşın faydalanması, iş proseslərinin daha da şəffaflaşdırılması, eləcə də sui-istifadə hallarının qarşısının alınması məqsədilə ipoteka kreditlərinin verilməsi qaydalarına dəyişiklik edilib.

AzadAzərbaycan xəbər verir ki, dəyişikliyə əsasən, yaşayış sahələrini satmaq öhdəliyi ilə kirayəyə vermə mexanizmi çərçivəsində Fondla bağlanmış qüvvədə olan kirayə müqaviləsi üzrə kirayəçi olmayan şəxs əsas borcalan qismində ipoteka kreditindən yararlana bilər.

Bununla yanaşı, ipoteka kreditlərinə müraciət zamanı SİMA rəqəmsal imzanın üztanıma texnologiyası tətbiq olunacaq. Yeni həll sayəsində vətəndaşlar müraciətlərini biometrik identifikasiya funksionallığı ilə təsdiqləyə biləcəklər ki, bu da prosesin təhlükəsizliyini və şəffaflığını təmin edəcək.

Qeyd edək ki, İpoteka və Kredit Zəmanət Fondu 2006-cı ildən etibarən ölkədə uzunmüddətli ipoteka kreditləşməsini maliyyələşdirir. İndiyədək qurumun vəsaiti hesabına müvəkkil banklar vasitəsilə 4 milyard 185 milyon manat məbləğində 61 minə yaxın ipoteka krediti verilib.