Qara dənizdə gəmilər toqquşdu: 7 türk dənizçi xilas edilir
AzadAzərbaycanRedaksiyaQara dənizdə Rumıniya sahilləri yaxınlığında gəmilərin toqquşması nəticəsində təhlükə ilə üzləşən 7 türkiyəli dənizçinin xilası üçün əməliyyat başladılıb.
Qara dənizdə, Rumıniyanın Neptun kurort qəsəbəsi yaxınlığında dəniz qəzası qeydə alınıb. Baş verən olayla bağlı Rumıniya Daxili İşlər Nazirliyi tərəfindən dərhal xilasetmə əməliyyatına start verilib.
Məlumata görə, Türkiyə bayrağı altında üzən "Ayaz Bey" yedək gəmisi ilə Antiqua və Barbuda bayraqlı "Mentor" gəmisi toqquşub. Hadisədən sonra, saat 04:20 radələrində "Ayaz Bey" gəmisindən beynəlxalq qəza siqnalı daxil olub.
Bildirilir ki, Türkiyəyə məxsus "Ayaz Bey" və "Ramazan Bey" yedək gəmiləri bundan əvvəl Ukrayna sularında, Odessa limanı yaxınlığında zədələnmiş və göyərtəsində heyət olmayan "Mentor" gəmisini Türkiyəyə tərəf aparırmış.
Gecə saatlarında havanın kəskin pisləşməsi səbəbindən gəmiləri bir-birinə bağlayan yedək trosları qırılıb. Troslar yenidən bərpa edilsə də, manevr zamanı "Ayaz Bey" gəmisi "Mentor"la toqquşaraq zədələnib. Göyərtədə olan 7 türkiyəli dənizçinin xilas edilməsi üçün işlər davam etdirilir.
