Hikmət Hacıyev: Ermənistan Azərbaycan xalqından üzr istəməlidir

Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev "Bakı Mədəniyyət və Media Dialoqu Platforması" çərçivəsində təşkil edilən "Sülhün dili və dezinformasiyaya qarşı mübarizə" mövzusundakı xüsusi sessiyada vacib məqamlara toxunub. AzadAzərbaycan xəbər verir ki, o, tarixdən silinməsi mümkün olmayan müəyyən hadisələrin varlığını vurğulayıb.

H.Hacıyev bildirib ki, Azərbaycan tərəfinin məqsədi revanş almaq deyil. Bununla yanaşı, regionda daimi və əbədi sülhün bərqərar olması üçün hələ də zəruri addımların atılmasına və yeni təşəbbüslərin irəli sürülməsinə böyük ehtiyac var.

Prezidentin köməkçisi xüsusilə qeyd edib ki, Ermənistan tərəfi Azərbaycan xalqından üzr istəməlidir. Onun sözlərinə görə, Ermənistan cəmiyyəti 30 il ərzində öz doğma torpaqlarına qayıda bilməyən azərbaycanlılara qarşı üzrxahlıq etməlidir.