Cinayətdə ittiham olunan Elmir Nuriyev Almaniyadan Azərbaycana ekstradisiya edilib

Azərbaycan Respublikasının Ədliyyə Nazirliyi xarici dövlətlərin aidiyyəti qurumları ilə birgə beynəlxalq axtarışda olan şəxslərin ölkəyə gətirilməsi istiqamətində tədbirləri davam etdirir.

İnterpolun Azərbaycandakı Milli Mərkəzi Bürosunun xətti ilə beynəlxalq axtarışa verilən Elmir Nuriyev Almaniyada müəyyən edilərək saxlanılıb. O, 2021-ci ildə dələduzluq əməllərində, xüsusən də mənzillərin təmiri adı altında vətəndaşların etibarından sui-istifadə edərək külli miqdarda əmlakını ələ keçirməkdə ittiham olunur.

Baş Prokurorluğun sorğusu və Ədliyyə Nazirliyinin təqdim etdiyi zəmanətlər əsasında aparılan danışıqlar nəticəsində təqsirləndirilən şəxsin ekstradisiyasına razılıq əldə olunub.

Elmir Nuriyev nazirliyin Beynəlxalq əməkdaşlıq baş idarəsinin və Penitensiar xidmətin əməkdaşlarının müşayiəti ilə Almaniyadan Azərbaycana gətirilib və məhkəmənin qərarı ilə istintaq təcridxanasına yerləşdirilib.