Baş Dövlət Yol Polisi İdarəsindən dumanlı hava ilə bağlı xəbərdarlıq

Azərbaycan ərazisində müşahidə edilən dumanlı hava şəraiti səbəbindən Abşeron yarımadası başda olmaqla, bir çox bölgədə görünüş məsafəsi kəskin şəkildə məhdudlaşıb.

AzadAzərbaycan xəbər verir ki, Baş Dövlət Yol Polisi İdarəsi yollarda təhlükəsizliyin təmin olunması məqsədilə vətəndaşlara müraciət yayıb.

Bildirilib ki, xüsusilə səhər və axşam saatlarında duman sürücülərin işini çətinləşdirir və bu da ağır yol-nəqliyyat hadisələrinin, eləcə də zəncirvari qəzaların baş vermə riskini artırır.

Qurum sürücülərə sürət həddini hava şəraitinə uyğunlaşdırmağı, nəqliyyat vasitələri arasındakı təhlükəsiz ara məsafəsini saxlamağı, həmçinin xarici işıq cihazlarının sazlığına diqqət yetirməyi tövsiyə edib.

İdarə eyni zamanda piyadalara müraciət edərək dumanlı havada sürücülərin yolları görməkdə çətinlik çəkdiyini xatırladıb və onları hərəkətdə olarkən son dərəcə diqqətli olmağa çağırıb.