Bakıda restoranda kütləvi zəhərlənmə faktı araşdırılır

AzadAzərbaycan xəbər verir ki, Bakı şəhərinin Nizami rayonu ərazisində fəaliyyət göstərən “Qızıl Qaya” restoranında zəhərlənmə şübhəsilə bağlı Azərbaycan Qida Təhlükəsizliyi Agentliyi (AQTA) tərəfindən genişmiqyaslı yoxlamalara start verilib.

Qurum tərəfindən aparılan ilkin baxış zamanı iaşə obyektinin ümumi sanitar-gigiyenik vəziyyətinin tələblərə cavab vermədiyi üzə çıxıb. Eyni zamanda, qida məhsullarının emalı və saxlanması prosesində ciddi nöqsanlar, eləcə də çarpaz çirklənmə halları aşkarlanıb.

Aşkar edilən uyğunsuzluqlarla bağlı müvafiq laborator müayinələrin aparılması məqsədilə ərzaq məhsullarından nümunələr götürülüb. Hazırda faktla bağlı araşdırma işləri davam etdirilir.