Bakıda Macarıstanın milli bayramı münasibətilə rəsmi qəbul təşkil olunub

Bakıda Macarıstanın milli bayramı olan Müstəqillik Günü münasibətilə rəsmi tədbir təşkil olunub. Macarıstan səfirliyinin ev sahibliyi etdiyi mərasimdə hökumət rəsmiləri, deputatlar və ictimaiyyət nümayəndələri iştirak ediblər.

Tədbirdə çıxış edən Macarıstanın Azərbaycandakı səfiri Tamaş Torma ölkəsinin azadlıq tarixindən danışıb. O, 1956-cı il hadisələrinin milli yaddaşdakı xüsusi rolunu vurğulayaraq, hər iki xalqın müstəqillik və suverenlik uğrunda apardığı mübarizənin oxşar cəhətlərini qeyd edib. Diplomat Azərbaycanın ərazi bütövlüyünü bərpa etdikdən sonra beynəlxalq arenada fəal rol oynadığını və Avropanın enerji təhlükəsizliyinə mühüm töhfə verdiyini bildirib.

Səfir Azərbaycan ilə Macarıstan arasındakı münasibətlərin genişləndirilmiş strateji tərəfdaşlıq səviyyəsinə yüksəldiyini xatırladıb. Onun sözlərinə görə, enerji, bərpaolunan mənbələr, kənd təsərrüfatı, eləcə də təhsil və humanitar sahələrdə əməkdaşlıq uğurla davam edir. Xüsusilə Yaşıl Enerji Dəhlizi layihəsinin və “Stipendium Hungaricum” təqaüd proqramının əhəmiyyəti diqqətə çatdırılıb.

Azərbaycan hökumətinin adından çıxış edən Xarici İşlər Nazirliyinin İqtisadi Əməkdaşlıq Departamentinin direktoru Nərgiz Qurbanova Macarıstan xalqını təbrik edib. O, iki ölkə arasında siyasi dialoqun, iqtisadi, nəqliyyat və yaşıl enerji sahələrindəki tərəfdaşlığın gələcək perspektivlərindən danışıb, həmçinin beynəlxalq təşkilatlar çərçivəsində qurılan səmərəli əməkdaşlığı yüksək qiymətləndirib.