Alman səfirdən etiraf: 1991-ci ildən sonra Rusiya ilə bağlı səhv etmişik

AzadAzərbaycan xəbər verir ki, SSRİ-nin dağılmasından sonra Almaniya uzun illər ərzində Rusiyanı özünə tərəfdaş etməyə çalışıb, lakin aparılan bu xarici siyasət xətti özünü doğrultmayıb.

Almaniyanın Ukraynadakı səfiri Boris Ruge bəyan edib ki, Berlinin 1991-ci ildən sonrakı dövrdə Moskva ilə əlaqələrinin tarixi Almaniya tərəfinin mühüm strateji səhvlərə yol verdiyini açıq şəkildə ortaya qoyur.

Diplomat qeyd edib ki, Almaniya Rusiya ilə etibarlı tərəfdaşlıq əlaqələri qura biləcəyini düşünərək yanılgıya düşüb. Onun sözlərinə görə, Rusiya təklif olunan əməkdaşlıqdan imtina edərək Avropanın siyasi arxitekturasını dəyişdirməyi hədəfləyən təcavüzkar bir oyunçuya çevrilib.

Ruge əlavə edib ki, həmin illərdə həm Almaniya, həm də bütün Avropa ölkələri Moskva ilə dostluq münasibətləri yaratmaq üçün böyük səylər göstərib, lakin Rusiya sülh əvəzinə müharibəni və hibrid hücumları seçib.