AFFA prezidenti Rövşən Nəcəf Hövsan Yarış Kompleksində olub

Azərbaycan Futbol Federasiyaları Assosiasiyasının (AFFA) prezidenti Rövşən Nəcəf Hövsan Yarış Kompleksində olub. O, burada Azərbaycan və Andorra komandaları arasındakı qarşılaşmanı tribunadan izləyib və idman obyektində yaradılan şəraitlə yaxından tanış olub.

Federasiya rəhbəri səfər çərçivəsində kompleksdə matçların müxtəlif hava şəraitində keçirilməsi istiqamətində görülən hazırlıq işləri ilə maraqlanıb. Millimizin nümayiş etdirdiyi uğurlu oyun tribunadakı valideynlər və federasiya rəsmiləri tərəfindən böyük coşqu ilə qarşılanıb.

Məlumat üçün bildirək ki, Hövsan Yarış Kompleksinin infrastrukturu eyni vaxtda 20 oyunun keçirilməsinə imkan yaradır. Hər meydançada gün ərzində onadək qarşılaşma təşkil olunur və yeni quraşdırılan peşəkar işıqlandırma sistemləri sayəsində matçlar axşam saatlarında da davam edir.