Veteranlar Zəfər Günü ərəfəsində Şəhidlər Xiyabanını və Türk Şəhidliyini ziyarət ediblər

Müharibə, Əmək və Silahlı Qüvvələr Veteranları Təşkilatının nümayəndələri 8 Noyabr – Zəfər Günü münasibətilə Hərbi Memorial Məzarlığı, Şəhidlər Xiyabanı və Zəfər abidəsini ziyarət ediblər. AzadAzərbaycan xəbər verir ki, təşkilat sədri polkovnik Cəlil Xəlilovun başçılıq etdiyi heyət şəhidlərimizin əziz xatirəsini yad edərək məzarları üzərinə gül dəstələri düzüb, dualar oxuyublar.

Ziyarət zamanı gənclər və yeniyetmələr qarşısında çıxış edən polkovnik Cəlil Xəlilov 8 Noyabr qələbəsinin tarixi manasından söz açıb. O bildirib ki, bu tarixi zəfər 30 il davam edən erməni işğalına son qoyaraq bölgədə sülh və sabitliyin bərqərar olmasına zəmin yaradıb. Təşkilat sədri vurğulayıb ki, Prezident, Müzəffər Ali Baş Komandan İlham Əliyevin rəhbərliyi ilə qazanılan bu uğura görə ilk növbədə canlarını fəda edən şəhidlərimizə borcluyuq.

Veteranlar daha sonra paytaxtda yerləşən Türk Şəhidliyini də ziyarət ediblər. Cəlil Xəlilov Azərbaycan ilə Türkiyə arasındakı sarsılmaz qardaşlıq münasibətlərinin dərin köklərə söykəndiyini və bu birliyin bütün dünyaya nümunə olduğunu diqqətə çatdırıb.

Xatırladaq ki, 4 noyabr tarixində veteranlar polkovnik Cəlil Xəlilovun təşəbbüsü ilə Zəfər Gününün ildönümü münasibətilə bəyanat yayaraq dövlət başçısı İlham Əliyevi və xalqımızı təbrik ediblər.