Türkiyənin İranla hərbi ittifaq yaratması ehtimalı qiymətləndirilib

Tehranda İran, Səudiyyə Ərəbistanı, Türkiyə və Pakistanın rəsmi nümayəndələri arasında baş tutan yüksəksəviyyəli görüş regionda yeni hərbi ittifaqın yaradılması ehtimallarını gündəmə gətirib. Politoloq Heydər Oğuz mövzu ilə bağlı bildirib ki, Məkkə Sazişinin əsas qayəsini Səudiyyə Ərəbistanını husilərin və zərurət olduqda İranın mümkün hücumlarından qorumaq təşkil edir. Ankara daxili siyasi amillərə görə bu mövqeyi açıq bəyan etməkdə çətinlik çəksə də, İranın sözügedən müdafiə sazişinə qoşulması real görünmür.

Ekspert vurğulayıb ki, Türkiyə NATO üzvüdür və alyansın aparıcı gücü olan ABŞ İranla ziddiyyətli münasibətlərə malikdir. Digər tərəfdən, Səudiyyə Ərəbistanı da Hörmüz və Bab əl-Məndəb boğazlarındakı gərginlik fonunda Tehranla eyni hərbi blokda yer almağa meylli deyil. Bu baxımdan, regional tərəfdaşların İrana qarşı eyni platformada bir araya gəlməsi mürəkkəb siyasi mənzərə yaradır.

Politoloqun fikrincə, üç ölkənin hərbi və kəşfiyyat rəhbərlərinin Tehrana səfər etməsinin başlıca səbəbi husilərin Məkkəni hədəf almaq təhlükəsi ilə bağlı İrana xəbərdarlıq etmək ola bilər. Məkkənin təhlükəsizliyi bütün İslam aləmi üçün həssas məsələdir və diplomatik nümayəndə heyətlərinin deyil, məhz təhlükəsizlik strukturlarının təmsilçilərinin görüşməsi ciddi faktların mövcudluğundan xəbər verir.

Diqqətə çatdırılıb ki, sözügedən addımların arxasında ABŞ faktoru dayanır. İttifaqın aparıcı ölkələri Vaşinqtonla yaxın müttəfiqlik əlaqələrinə malikdir. ABŞ-nin İranla münasibətlərində gərginliyin artdığı bir vaxtda Türkiyənin Tehranla hərbi ittifaqa daxil olması praktiki olaraq mümkünsüz qiymətləndirilir.

Xatırladaq ki, Səudiyyə Ərəbistanının müdafiə naziri Xalid bin Salman, Pakistan ordusunun komandanı Asim Munir və Türkiyə Milli İstehbarat Təşkilatının rəhbəri İbrahim Kalının İrana səfəri çərçivəsində dörd ölkənin iştirakı ilə birgə bəyanat qəbul olunub.