Türkiyə bayrağının endirilməsi ilə bağlı iddialar həqiqəti əks etdirmir

AzadAzərbaycan xəbər verir ki, bəzi kütləvi informasiya vasitələrində və sosial şəbəkə platformalarında paylaşılan Türkiyə bayrağının Azərbaycanda endirilməsinə cəhd edildiyi iddiaları tamamilə dezinformasiyadır.

Məsələ ilə bağlı Türkiyə Prezident Administrasiyasının Dezinformasiya ilə Mübarizə Mərkəzi sosial şəbəkə hesabında açıqlama yayıb. Bildirilib ki, müzakirələrə səbəb olan həmin videogörüntülər tamamilə köhnə tarixə aiddir.

Açıqlamada qeyd olunub ki, görüntülərin çəkildiyi vaxt Türkiyə bayrağına qarşı təxribat törətmək istəyənlərə dərhal Azərbaycan vətəndaşları tərəfindən ən sərt reaksiya göstərilib və bayrağın endirilməsi kimi heç bir hal yaşanmayıb.

Mərkəz bu cür köhnə kadrların qəsdən yenidən dövriyyəyə buraxılmasının iki qardaş ölkə arasındakı sarsılmaz dostluq münasibətlərini hədəf aldığını vurğulayıb və vətəndaşları belə manipulyasiyalara qarşı diqqətli olmağa çağırıb.