Sinqapurda subayların bir-biri ilə tanış olması üçün yeni platforma yaradılıb

AzadAzərbaycan xəbər verir ki, Sinqapur rəhbərliyi gənc subayların tanış olmasını və əlaqə qurmasını asanlaşdırmaq məqsədilə "FirstDate" adlı yeni platformanı pilot layihə olaraq reallaşdırıb.

Hazırda bu təşəbbüsdən yaşı 21 ilə 35 arasında dəyişən və şəxsiyyəti təsdiqlənmiş dövlət sektoru işçiləri yararlana bilirlər. Sistem iştirakçıların ortaq maraqlarını, həyat tərzini, dəyərlərini və tərəfdaş seçimlərini analiz edərək uyğun namizədi müəyyənləşdirir.

Qeydiyyat prosesində vətəndaşların şəxsiyyəti "Singpass" sistemi vasitəsilə yoxlanılır. Uyğunlaşdırma mərhələsində isə riyazi oyun nəzəriyyəsinə əsaslanan xüsusi alqoritmlərdən istifadə olunur.

Layihənin tətbiqi ölkədə doğum səviyyəsinin aşağı düşdüyü dövrə təsadüf edir. Hökumət bu addımla nikah və ailə quruculuğunu stimullaşdırmağı hədəfləyir.