Media və Yayım Şurası jurnalistlərə qarşı zorakılıq halları ilə bağlı bəyanat yayıb

Son dövrlərdə media nümayəndələrinin hadisə yerlərində çəkiliş zamanı hücuma məruz qalması, fiziki zorakılıqla üzləşməsi və peşə vəzifələrini yerinə yetirmələrinə süni maneələrin yaradılması dərindən narahatlıq doğurur.

AzadAzərbaycan xəbər verir ki, bu barədə Azərbaycan Respublikası Media və Yayım Şurasının yaydığı xüsusi bəyanatda qeyd olunub. Bildirilib ki, jurnalistlərin təhlükəsizliyini hədəf alan bu cür neqativ hallar cəmiyyətin obyektiv məlumat almaq hüququna açıq müdaxilədir.

Sənəddə “Media haqqında” Azərbaycan Respublikası Qanununun müvafiq maddələrinə istinad edilərək, media işçilərinin peşəkar fəaliyyətinə qanunsuz müdaxilənin, təzyiqin və təqiblərin yolverilməz olduğu vurğulanıb.

Media və Yayım Şurası baş verən hadisələrin obyektiv və hərtərəfli araşdırılacağına inamını ifadə edərək, hər kəsi jurnalistlərin qanuni fəaliyyətinə hörmətlə yanaşmağa və onların təhlükəsiz işləməsi üçün şərait yaratmağa çağırıb.