Kürdəmirdə magistral boru partladı: Rayon mərkəzi və altı kənd susuz qaldı

AzadAzərbaycan xəbər verir ki, Kürdəmir rayonunda magistral su kəmərində qəza baş verib. Hadisə nəticəsində həm rayon mərkəzinin, həm də ətrafdakı altı kəndin su təchizatında fasilə yaranıb.

Boru xəttindəki nasazlıq Külüllü-Kürdəmir magistral su kəmərinin 31-ci kilometrliyində, Topalhəsənli kəndindən keçən sahəsində qeydə alınıb. İlkin məlumata görə, diametri 500 millimetr olan su borusu qəfil partlayıb.

Baş vermiş qəzanın aradan qaldırılması məqsədilə əraziyə müvafiq qurumların xüsusi texnikaları və təmir briqadaları cəlb edilib. Hazırda yaranmış problemin tez bir zamanda həlli üçün bərpa işləri həyata keçirilir.

Məlumat üçün bildirək ki, sözügedən Külüllü-Kürdəmir magistral su xətti dövlət vəsaiti hesabına 2013-cü ildə istismara verilib. Bu infrastruktur rayon üzrə təxminən 21 min sakinin içməli su ilə təminatında mühüm rol oynayır.