Azərbaycanda texnologiyalar parkları ilə bağlı mühüm fərman imzalandı

AzadAzərbaycan xəbər verir ki, Prezident İlham Əliyev "Texnologiyalar parkı haqqında Nümunəvi Əsasnamə"də dəyişikliklərin edilməsi barədə fərman imzalayıb. Yenilənmiş qaydalara əsasən, texnoparkın infrastrukturu üzrə icarə müqaviləsi bağlayaraq ərazidə sahibkarlıqla məşğul olan və rezidentlərə mal, iş və ya xidmət təqdim edən hüquqi və ya fiziki şəxslər artıq texnoparkın qeyri-rezidenti hesab ediləcək.

Sənəddə əksini tapan digər müddəaya görə, idarəetmə sazişi başa çatdıqda operatorun infrastruktur obyektləri tərəflərin razılığı, kompensasiya şərtləri və təhvil-təslim qaydaları əsasında idarəedici təşkilata verilə bilər. Həmçinin rezidentin öz vəsaiti hesabına elmi tədqiqatlar və təcrübə-konstruktor fəaliyyəti üçün qurduğu istehsal sahəsi, avadanlıq və qurğular birbaşa rezidentin xüsusi mülkiyyəti sayılır.

Bununla yanaşı, Əsasnaməyə bir sıra müasir anlayışlar daxil edilib. Bunların sırasına rəqəmsal texnologiya, süni intellekt texnologiyası, innovasiya məhsulu, kibertəhlükəsizlik, elmi tədqiqat, layihə-axtarış və təcrübə-konstruktor işləri, eləcə də bulud hesablama xidmətləri kimi mühüm terminlər və onların hüquqi izahları əlavə olunub.

Dəyişikliklərə görə, texnoparkın rezident və qeyri-rezidentlərinə ayrılmış infrastrukturun idarəedici təşkilatın və ya operatorun yazılı icazəsi olmadan subicarəyə verilməsi və ya müqavilədən kənar məqsədlərlə istifadəsi qadağandır. Həmçinin torpaq sahələri infrastrukturun qurulması üçün operatora icarəyə verilə bilər, idarəetmə sazişinin ləğvi isə icarə müqaviləsinə xitam verilməsinə əsas yaradır.

Nazirlər Kabinetinə "Texnologiyalar Parkının Ekspertlər Şurası haqqında Əsasnamə"nin təkmilləşdirilməsi ilə bağlı üç ay müddətində zəruri tədbirlər görmək və dövlət başçısına məlumat vermək tapşırılıb. Qeyd edək ki, 2027-ci il yanvarın 1-dək verilmiş qeydiyyat şəhadətnamələri qüvvədə qalır və həmin rezidentlər fəaliyyətlərini ilin sonunadək yeni tələblərə uyğunlaşdırmalıdırlar.