İnformasiya təhlükəsizliyində televiziya və radionun strateji rolu

İnformasiya əsrində televiziya və radio yalnız xəbər çatdıran vasitələr deyil, həm də milli kimliyin qorunması, ictimai düşüncənin formalaşması və informasiya təhlükəsizliyinin təmin olunmasında mühüm rol oynayan strateji institutlardır. Rəqəmsallaşmanın sürətləndiyi, dezinformasiyanın cəmiyyətlər üçün ciddi təhdidə çevrildiyi müasir dünyada milli yayımçıların qarşısında dayanan vəzifələr daha böyük əhəmiyyət kəsb edir.

Müasir dövrdə informasiya ən mühüm strateji resurslardan birinə çevrilib. Dövlətlərin gücü artıq yalnız iqtisadi imkanlar və hərbi potensialla ölçülmür. Cəmiyyətin etibarlı məlumatlara çıxışı, milli maraqların informasiya məkanında müdafiəsi və ictimai rəyin manipulyasiyalardan qorunması da dövlətlərin dayanıqlığını müəyyənləşdirən əsas amillərdəndir. AzadAzərbaycan xəbər verir ki, yanlış məlumatlar və saxta görüntülər fonunda peşəkar media resurslarının rolu daha da artır.

Televiziyanın təsir gücü onun yalnız texniki imkanları ilə məhdudlaşmır. Məzmun, aparıcıların təqdimat tərzi, xəbərlərin seçilməsi və analizlər auditoriyanın dünyagörüşünə bilavasitə təsir göstərir. Bu təsir xüsusilə uşaqların və gənclərin dünyanı dərk etməsində, milli-mədəni dəyərləri mənimsəməsində özünü birbaşa büruzə verir.

Milli maraqlara xidmət etmək informasiyanın birtərəfli təqdim olunması demək deyil. Əksinə, milli maraqların uzunmüddətli qorunması etibarlı faktlara, peşəkar jurnalistikaya və auditoriyanın etimadına söykənir. Azərbaycan Televiziyası da 1956-cı ildən bu günədək milli dilin, mədəniyyətin və tarihi yaddaşın qorunmasında öz tarixi missiyasını davam etdirir.