Canavarların yaşayış məntəqələrinə yaxınlaşmasının əsl səbəbi açıqlanıb
AzadAzərbaycanRedaksiyaZooloqlar canavarların insan məskənlərinə hücum etməsinin və ya yaxınlaşmasının səbəblərini açıqlayıblar. Mütəxəssislərin fikrincə, bu, aclıqla deyil, balaların ov etməyə öyrədilməsi ilə bağlıdır.
Meşə təsərrüfatı rəsmiləri bəzi bölgələrdə canavarların sayının artması ilə bağlı xəbərləri təkzib etsələr də, yırtıcıların yaşayış məntəqələrinə yaxınlaşması halları qeydə alınmaqdadır. Mütəxəssislər bu vəziyyətin səbəblərini araşdırıblar.
Zooloq Mixail Kreçmarın sözlərinə görə, bu cür halların arxasında duran əsas səbəb meşələrdə qida qıtlığı deyil. Yetkin canavarlar balalarını daha asan ov əldə olunan ərazilərə, o cümlədən insan məskənlərinin yaxınlığına gətirirlər. Məsələn, Leninqrad vilayətinin Qatçina rayonunda canavarlar balalarını məhz bu cür ərazilərdə ov etməyə öyrədirlər.
Digər amillər arasında isə tullantı qoxuları, qış mövsümündən əvvəl baş verən miqrasiyalar və meşə sahələrinin qırılması mühüm rol oynayır. İnsan fəaliyyəti nəticəsində yırtıcılar yaşayış yerlərinə daha çox cəlb olunurlar. Eyni zamanda, mütəxəssislər qeyd edirlər ki, sakinlərin gördüyü heyvanların böyük bir hissəsi sadəcə iri cins itlər ola bilər.
Hazırda Rusiyanın Yakutiya və Çukotka bölgələri bu baxımdan daha gərgin ərazilər olaraq qalır. Ölkənin bəzi bölgələrində, o cümlədən Tümen və Moskva vilayətlərində canavar populyasiyasının nəzarətdə saxlanılması məqsədilə müvafiq tədbirlərin görüləcəyi bildirilir.
