Azərbaycan boksçuları Avropa çempionatlarında medalların sayını 25-ə çatdırıblar

Azərbaycanın boks yığmaları 2026-cı il ərzində iştirak etdikləri qitə birinciliklərində böyük uğura imza atıblar. Ölkə təmsilçiləri dörd Avropa çempionatında ümumilikdə 25 medal qazanmağa müvəffəq olublar.

Azərbaycan Boks Federasiyasından verilən açıqlamaya əsasən, bu medallardan 5-i qızıl, 8-i gümüş, 12-si isə bürünc əyarlıdır. Yarışlar arasında ən yüksək nəticəni Trabzondakı turnirdən 10 medalla qayıdan U-15 milli komandası göstərib.

Bununla yanaşı, U-17 yığması qitə birinciliyini 8 medalla başa vurub. Böyüklərdən ibarət komanda isə rekord göstəriciyə imza ataraq 5 mükafat əldə edib. Hər iki heyətdən iki idmançı Avropa çempionu adını qazanıb. U-19 millisi isə aktivinə 2 medal yazdırıb.

Azərbaycan boksçuları qatıldıqları bütün turnirlərdən mükafatla dönərək ölkəmizi layiqincə təmsil ediblər. Komandalarımız yarışların üçündə medalların keyfiyyətinə görə ilk altı sıradan yer almağı bacarıblar.