Avstraliya 16 yaşdan kiçiklərlə bağlı qadağanı pozan 5 sosial şəbəkəni məhkəməyə verir

Avstraliya hakimiyyəti 16 yaşından kiçik istifadəçilərə sosial mediadan istifadə qadağasını gözləmədikləri üçün "Facebook", "Instagram", "TikTok", "Snapchat" və "YouTube" platformalarına qarşı hüquqi müstəvidə iddia qaldırmağı planlaşdırır.

Ölkənin Rabitə naziri Anika Uellsin verdiyi məlumata əsasən, Avstraliyanın onlayn təhlükəsizlik üzrə tənzimləyici orqanı olan eSafety Komissarlığı artıq məhkəmə iddiası üçün lazım olan sübutları toplamağa başlayıb. Tənzimləyici qurum mart ayından etibarən sözügedən platformaların qanunlara nə dərəcədə əməl etdiyini araşdırır.

Aparılan təhqiqatlar nəticəsində bəlli olub ki, platformalarda yaşın dürüst yoxlanılması mexanizmlərinin zəif olması səbəbindən 16 yaşdan kiçik yeniyetmələrin böyük əksəriyyəti öz profillərini saxlamağa və ya yenilərini yaratmağa müvəffəq olublar.

Qeyd edək ki, 2025-ci ilin dekabrından qüvvəyə minən qaydalara görə, sosial media şirkətləri 16 yaşdan kiçiklərin qeydiyyatdan keçməsinin qarşısını almaq üçün lazımi addımlar atmalıdırlar. Qanunvericiliyi pozan şirkətləri 109,2 milyon Avstraliya dollarınadək cərimə gözləyir. Yaranan yeni səlahiyyətlər çərçivəsində Komissarlıq beş şirkətə qarşı Federal Məhkəmədə iddia qaldıra bilər.