Ukrayna PUA-ları süni intellekt sayəsində hədəfləri 90 faizdən çox dəqiqliklə vurur

Ukraynadakı hərbi münaqişə süni intellekt sistemlərinin tətbiqi üçün əsas sınaq meydanına çevrilib. Bu yeniliklər hədəflərin əldə edilməsi prosesini sürətləndirir və zərbələrin endirilməsinə mühüm dəstək göstərir.

Ukraynanın "Norda Dynamics" şirkəti tərəfindən hazırlanan "Underdog" idarəetmə sistemi pilotsuz uçuş aparatlarına hücumu müstəqil şəkildə tamamlamağa imkan verir. "The Wall Street Journal" nəşrinin məlumatına görə, nəzarət bu sistemə keçdikdə hədəfi vurma dəqiqliyi 90 faizi ötür.

Yeni texnologiya qərar qəbul etmək üçün cəmi saniyələrin qaldığı kritik məqamlarda operatordan asılılığı minimuma endirir. Eyni zamanda, Ukrayna ordusu döyüş əməliyyatlarının gedişatı barədə nəhəng həcmdə məlumat toplayır və "Delta" platforması gündə petabaytlarla informasiya emal edir.

Böyük Britaniyanın dəstəyi ilə Müdafiə Nazirliyinin tərkibində yaradılan A1 mərkəzi bu məlumatların təhlili üçün "Spectr" sistemindən yararlanır. Bu sistem qərargah zabitlərinin bəzi funksiyalarını yerinə yetirərək bölmələrə internet bağlantısı olmadan belə qərar qəbul etməyə şərait yaradır.

Mütəxəssislər hesab edirlər ki, hərbi sahədə süni intellektdən istifadənin genişlənməsi qoşunların zərbələrə məruz qaldığı əraziləri genişləndirir və hədəfin aşkarlanması ilə hücum arasındakı zaman intervalını qısaldır. Tərtibatçılar bu yeniliklərin tətbiq edilməməsini strateji risk kimi qiymətləndirirlər.