Paytaxtda Əlcəzair İnqilabının ildönümü münasibətilə rəsmi mərasim təşkil olunub

AzadAzərbaycan xəbər verir ki, Bakıda Əlcəzair İnqilabının 72-ci ildönümü ilə əlaqədar təntənəli mərasim təşkil edilib. Tədbirdə Milli Məclisin sədr müavini Ziyafət Əsgərov, energetika nazirinin müavini Kamal Abbasov, eləcə də digər rəsmi şəxslər, diplomatik korpusun nümayəndələri və ictimai-siyasi xadimlər qatılıblar.

Mərasim hər iki ölkənin dövlət himnlərinin səsləndirilməsi ilə başlayıb. Əlcəzairin Azərbaycandakı səfiri Zəkiyyə İğıl çıxış edərək dövlətlərimizin regional və beynəlxalq enerji təhlükəsizliyində oynadığı vacib rola toxunub. O, karbohidrogenlər, təbii qaz və bərpaolunan enerji istiqamətlərində əlaqələrin dərinləşməsi üçün böyük potensialın olduğunu bildirib.

Səfir SOCAR ilə "Sonatrach" şirkəti arasında neft-qaz sahəsində əməkdaşlıq memorandumunun təsdiqlənməsini müsbət qiymətləndirib. Eyni zamanda, iki ölkə arasında ticarət, iqtisadi, elmi və texniki sahələrdə birgə komissiyanın yaradılmasının əhəmiyyətini vurğulayan diplomat qurumun ilk iclasının 2027-ci ilin birinci yarısında Bakıda keçiriləcəyini gözlədiklərini söyləyib.

Milli Məclisin sədr müavini Ziyafət Əsgərov da öz növbəsində Azərbaycanla Əlcəzair arasındakı ikitərəfli münasibətlərin inkişaf dinamikasından, keçmişindən və gələcək əməkdaşlıq perspektivlərindən bəhs edib. Rəsmi hissə bədii proqramla davam etdirilib.

Xatırladaq ki, hər il noyabrın 1-i Əlcəzair İnqilabının başlanmasının ildönümü kimi qeyd olunur.