Marko Rubionun 2028-ci il seçkilərinə görə istefa verə biləcəyi iddia olunur

ABŞ dövlət katibi Marko Rubionun 2028-ci ildə baş tutacaq prezident seçkilərinə hazırlaşmaq üçün tutduğu postdan ayrılacağı ehtimal edilir. Bu barədə Britaniyanın nüfuzlu "The Independent" nəşri məlumat yayıb.

Məlumata əsasən, Rubionun bu addımı atmasına Respublikaçılar Partiyasının Konqresə aralıq seçkilərdə uduzması səbəb ola bilər. Eyni zamanda, siyasətçinin Donald Tramp administrasiyasının xarici siyasət xəttindən, xüsusilə də İrandakı proseslərdən məsafə saxlaması vacib hesab olunur.

Nəşr qeyd edir ki, bu strategiya onun gələcəkdə prezidentliyə namizədlik uğrunda mübarizədə mövqelərini gücləndirə bilər. Bununla yanaşı, yaxın zamanlarda Ağ Evdə bir neçə yüksəkvəzifəli şəxsin də istefa verə biləcəyi istisna olunmur.

Qeyd edək ki, yayılan bu iddialarla bağlı Ağ Ev və ABŞ Dövlət Departamenti dərhal açıqlama yayaraq məlumatı təkzib ediblər.