Kim Çen Inın vəfat etdiyi və hakimiyyətin bacısına keçdiyi iddia olunur

AzadAzərbaycan xəbər verir ki, xarici mətbuatda Şimali Koreya lideri Kim Çen Inın səhhəti və vəfat etməsi ilə bağlı yeni iddialar gündəmə gəlib. Məlumata görə, sosial şəbəkələrdə onun beyin qanaması keçirərək gizli şəkildə Çinə aparıldığı və ya həyatını itirdiyi bildirilir. Bununla belə, nə Şimali Koreya, nə də Çin rəsmiləri bu iddiaları təsdiqləyən hər hansı bəyanat verməyib.

Şimali Koreya liderinin sonuncu dəfə oktyabrın 11-də müdafiə sənayesi muzeyinə baş çəkdiyi, tədbirdə həyat yoldaşı və qızı ilə birgə iştirak etdiyi bildirilir. Dövlət mediası onun hərbi texnologiyalara baxış keçirdiyini nümayiş etdirən kadrlar yayımlasa da, bu görüntülər onun hazırkı sağlamlıq vəziyyəti haqqında tam dəqiq məlumat vermir.

Bununla yanaşı, ölkə rəhbərliyinin Kim Çen Inın bacısı Kim Yo Çjuna keçməsi barədə də şayiələr yayılıb. Hakim Koreya Fəhlə Partiyasında mühüm posta sahib olan Kim Yo Çjun ölkənin siyasi sistemində böyük nüfuza malikdir. Eyni zamanda, son illərdə rəsmi mərasimlərdə atasının yanında yer alan qızı Kim Çju Aenin də gələcək varis olacağı ehtimalları müzakirə edilir.

Şimali Koreya rəhbərinin səhhəti ilə bağlı oxşar şayiələr 2020-ci ildə də geniş yayılmışdı. Həmin vaxt da onun uzun müddət ictimaiyyət arasında görünməməsi müxtəlif ehtimallara yol açsa da, sonradan Kim Çen In yenidən rəsmi tədbirlərə qatılaraq iddiaları təkzib etmişdi.