Hesablama Palatası: Növbəti il büdcənin 15 gəlir mənbəyində artım gözlənilir

Azərbaycanın 2027-ci il dövlət büdcəsinin layihəsində 20 gəlir mənbəyindən 15-i üzrə artım, 4-ü üzrə azalma gözlənilir. Hüquqi tələblərə əsasən isə 1 gəlir mənbəyi ləğv olunub.

Milli Məclisin İqtisadi siyasət, sənaye və sahibkarlıq komitəsinin iclasında çıxış edən Hesablama Palatasının sədri Vüqar Gülməmmədov bildirib ki, büdcə daxilolmalarının artımı əsasən vergi ödənişləri hesabına təmin ediləcək. Vergi gəlirlərinin yarıya yaxın hissəsinin dolayı vergilər payına düşəcəyi və bu sahənin əsas fiskal mənbə kimi qalacağı gözlənilir. İqtisadi artım, inflyasiya gözləntiləri və vergi inzibatçılığının təkmilləşdirilməsi nəticəsində Dövlət Vergi Xidməti xətti ilə daxilolmaların cari ilin göstəricilərini üstələyəcəyi proqnozlaşdırılır.

Sədr qeyd edib ki, növbəti ildə idxalın dəyərinin 32,2 milyard manata çatacağı gözlənilir. Dövlət Gömrük Komitəsi vasitəsilə toplanacaq gəlirlərin idxal həcminə nisbəti ötən ilin faktiki göstəricisindən 0,6 faiz bəndi çox, cari ilin proqnozundan isə 0,3 faiz bəndi aşağı hesablanıb. Gömrükdə hər 100 manat daxilolma üçün 3,73 manat xərc çəkilməsi nəzərdə tutulur ki, bu da beynəlxalq standartlara görə orta-effektiv göstərici sayılır.

Vüqar Gülməmmədov əlavə edib ki, gömrük orqanları üzrə güzəşt və azadolmaların illik məbləği 3 milyard manat civarında proqnozlaşdırılır. Qanun layihəsində gömrük rüsumları 1 milyard 867 milyon manat göstərilsə də, bunun 30 milyon manatı gömrük yığımlarına aiddir. Palata sədri bu məsələyə layihədə müvafiq düzəlişin edilə biləcəyini vurğulayıb.