Fransada keçiriləcək etiraz aksiyaları zamanı 70 min polis səfərbər olunacaq

AzadAzərbaycan xəbər verir ki, Fransa rəhbərliyi ölkə daxilində təşkil olunacaq etiraz nümayişləri zamanı təhlükəsizliyin təmin edilməsi üçün genişmiqyaslı tədbirlərə əl atıb.

Daxili işlər naziri Loran Nunyesin verdiyi məlumata əsasən, bu məqsədlə ümumilikdə 70 min polis və jandarm əməkdaşı küçələrə yerləşdiriləcək.

Nazir bildirib ki, həyata keçiriləcək təhlükəsizlik tədbirləri ötən ay keçirilən ümumxalq tətili zamanı tətbiq olunan rejim ilə eyni səviyyədə olacaq.

Xüsusilə nəqliyyat qovşaqlarında, o cümlədən dəmir yolu stansiyalarında və avtomobil yollarında nəzarət və yoxlamalar əhəmiyyətli dərəcədə artırılacaq.