Rusiyalı şamanın Ukrayna müharibəsində qələbə üçün dəvə qurban kəsmək istəyi qalmaqal yaradıb

Rusiya Federasiyasının İrkutsk vilayətində fəaliyyət göstərən şaman Artur Tsıbikov Ukraynaya qarşı döyüşlərdə qələbə əldə olunması məqsədilə 60 dəvə qurban kəsmək niyyətində olduğunu açıqlayıb. Anqarskdakı "Əbədi Mavi Səma" təşkilatına rəhbərlik edən 53 yaşlı şaman planlarını mətbuatla bölüşüb.

Tsıbikov 2026-cı ilin noyabrından etibarən bir il ərzində hər ay beş dəvə qurban kəsməyi planlaşdırır. Onun sözlərinə görə, bu rituallar ölkədəki neqativ halları aradan qaldırmağa və Ukrayna ilə müharibənin tezliklə qələbə ilə başa çatmasına kömək etməlidir. Xatırladaq ki, o, 2019-cu ildə də oxşar ritual icra edərək beş dəvə öldürmüşdü.

Həmin vaxt bu addım heyvan hüquqları müdafiəçilərinin və digər şaman mərkəzlərinin sərt tənqidinə tuş gəlmişdi. Xüsusilə, "Tengeri" şaman mərkəzi buryat adət-ənənələrində dəvənin müqəddəs sayıldığını və qurban kəsilmədiyini bəyan etmişdi. Buna baxmayaraq, nəzarət qurumları yalnız daşınma qaydalarının pozulmasına görə cərimə tətbiq etmişdilər.

Yeni təşəbbüs də ictimai fəalların və digər şamanların narazılığına səbəb olub. Lakin şaman icmasının bir çox nümayəndəsi təqiblərdən qorxaraq Tsıbikovu açıq şəkildə tənqid etməkdən çəkinirlər. Mütəxəssislər və digər bölgələrin şamanları isə bu cür qurbanlıqların ənənəvi inanclara yad olduğunu bildirirlər.