Bakıda Azərbaycan və NATO-nun birgə təlimi yekunlaşıb

AzadAzərbaycan xəbər verir ki, Azərbaycan Respublikası ilə NATO arasında həyata keçirilən “Sülh Naminə Tərəfdaşlıq Proqramı” çərçivəsində “Tərəfdaş Ölkələrin Qabiliyyət Uyarlılığı Təşəbbüsü” təliminin növbəti mərhələsi yekunlaşıb. Tədbir çərçivəsində 3-cü görüş və 1-ci səviyyəli özünü qiymətləndirmə təlimi təşkil olunub.

Müdafiə Nazirliyinin verdiyi məlumata əsasən, təlim prosesini Azərbaycan Müdafiə Nazirliyinin yüksəkrütbəli zabitləri ilə yanaşı, Şimali Atlantika Alyansının nümayəndə heyəti və xüsusi monitorinq qrupu yaxından izləyib.

Proqramın əvvəlində iştirakçılara təlimin ssenarisi, icra qaydaları, təhlükəsizlik normaları və qiymətləndirmə mexanizmləri barədə ətraflı brifinq verilib, əsas hədəflər diqqətə çatdırılıb. Daha sonra heyət verilmiş praktiki tapşırıqları icra edib.

Müşahidəçilər hərbi bölmələrin koordinasiyalı fəaliyyətini, eləcə də şəxsi heyətin peşəkarlıq səviyyəsini və nəzəri-praktiki hazırlığını yüksək qiymətləndiriblər. Yekunda fərqlənən hərbi qulluqçular fəxri fərmanlar, sertifikatlar və müxtəlif mükafatlarla təltif olunublar.