Azərbaycanda gənc kişilər arasında ölüm hallarının səbəbləri açıqlanıb

Azərbaycanda 15-29 yaş aralığında olan kişilər arasında ölüm göstəricisi eyni yaş qrupundakı qadınlarla müqayisədə 2.2 dəfədən çoxdur. Bu barədə Dövlət Statistika Komitəsinin məlumatında bildirilib.

Statistikaya görə, 2025-ci ildə hər 100 min nəfər gənc kişi əhaliyə 77.1 ölüm halı düşüb. Həmin yaş kateqoriyasındakı qadınlarda isə bu rəqəm 34.6 təşkil edib.

Səhiyyə Nazirliyinin həkim eksperti Zakir Quliyev qeyd edib ki, təkcə Azərbaycanda deyil, qlobal miqyasda da gənc yaşda dünyasını dəyişən kişilərin sayı qadınlara nisbətən üstünlük təşkil edir və ümumilikdə qadınlar daha uzun ömür sürürlər.

Mütəxəssisin sözlərinə görə, zərərli vərdişlər, o cümlədən enerji içkilərinin istehlakı bu məsələdə mühüm rol oynayan amillər sırasındadır. Eyni zamanda, qadınların kişilərə nisbətən həkimlərə daha tez-tez müraciət etməsi də əsas səbəblər arasındadır.