Azərbaycanda Əsilzadələr Məclisinin fəaliyyətinin bərpa olunması müzakirə edilir

Azərbaycanın zadəgan nəsillərinin şəcərəsini araşdırmaq və mənəvi irsini qorumaq məqsədilə təsis edilmiş Əsilzadələr Məclisinin fəaliyyətinin bərpa olunması gündəmdədir.

İçərişəhər Dövlət Tarix-Memarlıq Qoruğu İdarəsindən bildirilib ki, quruma rəhbərlik etmiş xalq yazıçısı Maqsud İbrahimbəyovun 2016-cı ilin martında vəfat etməsindən sonra təşkilatın fəaliyyəti dayandırılıb. Hazırda Məclisin işinin yenidən canlandırılması istiqamətində müzakirələr aparılır və gələcəkdə adekvat addımların atılması istisna olunmur.

Məlumat üçün bildirək ki, bu məclis 1999-cu ildə Heydər Əliyevin dəstəyi və Maqsud İbrahimbəyovun rəhbərliyi ilə qurulmuşdu. Təşkilatın 1 nömrəli şəhadətnaməsi elə həmin il Heydər Əliyevə təqdim edilmişdi.

Təşkilatın yerləşdiyi tarixi bina 1914-cü ildə memar Zivərbəy Əhmədbəyov tərəfindən Maqsud İbrahimbəyovun babası, neft sənayeçisi Ələkbər Məşədibəyov üçün inşa edilib. Müxtəlif dövrlərdə yaşayış binası və müəssisə kimi istifadə olunan tikili 2001-ci ildə İçərişəhər Dövlət Qoruğunun tarixi abidələr siyahısına daxil edilib. 2018-ci ildə dövlət başçısının sərəncamı və Heydər Əliyev Fondunun dəstəyi ilə aparılan bərpadan sonra bina Maqsud İbrahimbəyov Yaradıcılıq Mərkəzi kimi fəaliyyətini davam etdirir.