Azərbaycan ilk dəfə keçirilən FIFA U-15 Dünya Çempionatına ev sahibliyi edir

Qlobal idman yarışlarının təşkilində geniş təcrübə qazanan Azərbaycan daha bir vacib futbol turnirinə ev sahibliyi etməyə başlayıb. Paytaxt Bakı tarixdə ilk dəfə təşkil olunan FIFA U-15 Dünya Çempionatı və Festivalının keçirildiyi məkan olub.

Bu mötəbər turnirin ölkəmizə həvalə edilməsi dövlət tərəfindən həyata keçirilən məqsədyönlü idman siyasətinin, müasir infrastrukturun qurulmasının və beynəlxalq idman qurumları ilə sıx əməkdaşlığın bəhrəsidir.

Dövlət başçısının 15 yaşınadək futbolçular arasında yarışın 2026-cı ildə ölkəmizdə təşkili ilə bağlı imzaladığı sərəncama əsasən, hazırlıq işləri yüksək keyfiyyətlə yekunlaşıb. Qarşılaşmaların keçiriləcəyi Hövsan Yarış Kompleksində lazımi şərait tam təmin edilib.

Geniş idman kompleksində yerləşən 10 futbol meydançasında turnir boyunca 1000-ə yaxın qarşılaşmanın baş tutması planlaşdırılır. Yarışda dünyanın 189 ölkəsindən, FIFA-ya üzv futbol assosiasiyalarını təmsil edən 4 mindən çox gənc idmançı, məşqçi heyəti və rəsmi şəxslər iştirak edir.