Azərbaycan Premyer Liqasında bu gün iki maraqlı qarşılaşma baş tutacaq

Azərbaycan Premyer Liqasında IX turun daha iki oyunu bu gün azarkeşlərin qarşısına çıxacaq. Günün ilk matçında "Kəpəz" səfərdə "Şəfa"nın qonağı olacaq və qarşılaşma saat 16:30-da start götürəcək.

Gəncə təmsilçisi hazırda 11 xalla turnir cədvəlinin 7-ci pilləsində qərarlaşıb. Meydan sahibləri isə aktivinə cəmi 3 xal yazdıraraq 11-ci sırada yer alıblar.

Günün digər maraqlı qarşılaşmasında "Neftçi" doğma meydanda "Turan Tovuz"u qəbul edəcək. Saat 19:00-da başlayacaq bu oyun üçün hakim təyinatları da açıqlanıb.

Məlumat üçün bildirək ki, paytaxt klubu 17 xalla ikinci, Qərb bölgəsinin təmsilçisi isə 14 xalla beşinci yerdədir. Xatırladaq ki, turun əvvəlki oyunlarında "Qəbələ" "Araz-Naxçıvan"ı, "Zirə" isə "Sumqayıt"ı məğlub etməyi bacarıb.