Avropanın avtomobil siyasəti böyük narazılıq yaradır: Ekspertlərdən və Asiyadan xəbərdarlıq

AzadAzərbaycan xəbər verir ki, Bruegel beyin mərkəzinin ekspertləri Almaniya və Fransanın avtomobil sənayesi üçün təklif etdiyi "Avropada istehsal olunmuş məhsullar" planının Avropa Birliyinə (AB) ciddi zərər vuracağı barədə xəbərdarlıq ediblər. Mütəxəssislər bildirirlər ki, bu addım ittifaqı qorumaq əvəzinə geosiyasi təcridə və rəqabət qabiliyyətinin aşağı düşməsinə gətirib çıxara bilər. Qeyd olunur ki, Böyük Britaniya, Türkiyə, Yaponiya və Cənubi Koreya kimi tərəfdaşların kənarlaşdırılması proteksionizm riskini artırır.

Ekspertlər yalnız Avropa ərazisində istehsal edilən elektrik avtomobillərinə subsidiya verilməsi yanaşmasının Ümumdünya Ticarət Təşkilatının qaydalarına, eləcə də mövcud sərbəst ticarət sazişlərinə zidd olduğunu vurğulayırlar. Onlar məhdudlaşdırıcı siyasət əvəzinə tərəfdaş ölkələrin də daxil edildiyi "AB ilə istehsal olunub" modelinin tətbiqini təklif edirlər. Çin məhsulları ilə bağlı riskləri nəzarətdə saxlamaq üçün isə sərt mənşə qaydalarının tətbiqi məqsədəuyğun hesab edilir.

Asiya turnesi zamanı bu təşəbbüslə bağlı kəskin reaksiyalarla qarşılaşan Almaniya kansleri Fridrix Merz Cənubi Koreya və Yaponiyadakı narahatlıqların intensivliyindən təəccübləndiyini gizlətməyib. Cənubi Koreya Prezidenti Li Ce Myunq daxil olmaqla, bölge liderləri ticarət əlaqələrinə mənfi təsir göstərəcək bu addıma etirazlarını bildiriblər. Merz bu narahatlıqları ciddi qəbul edəcəyini və məsələni 13 noyabrda Dublində keçiriləcək AB liderlərinin qeyri-rəsmi sammitində qaldıracağını bəyan edib.

Seulda jurnalistlərə açıqlama verən Almaniya kansleri həmçinin Yaxın Şərqdəki gərginliyin iqtisadi fəsadlarına toxunub. O qeyd edib ki, son səkkiz ayda baş verən münaqişələr Avropanın enerji xərclərinə 100 milyard avrodan (təxminən 112 milyard dollar) çox əlavə yük gətirib. Merz münaqişənin hərbi yolla həllinin mümkün olmadığını bildirərək, iqtisadi zərərləri dayandırmaq üçün diplomatik səylərin sürətləndirildiyini vurğulayıb.