Respublikaçılar Partiyasında seçki məğlubiyyəti daxili çəkişmələri gücləndirib

AzadAzərbaycan xəbər verir ki, ABŞ-da baş tutan aralıq seçkilərində Respublikaçılar Partiyasının məğlubiyyətə uğraması daxili qarşıdurmaları dərinləşdirib. Yaranmış vəziyyətdə partiya mənsublarının böyük əksəriyyəti əsas günahkar kimi sabiq lider Donald Trampı görür. Bloomberg-in yaydığı məlumata əsasən, bu nəticələr partiyadaxili çatı böyüdərək 2028-ci il prezident seçkilərində Trampın xələfi olmaq istəyənlər arasındakı rəqabəti daha da qızışdırıb.

On illik Tramp dominantlığından sonra önə çıxmağa çalışan yeni nəsil respublikaçılar artıq onun kursunu açıq şəkildə dəyişməyə səy göstərirlər. Əsas namizədlərdən sayılan vitse-prezident C.D. Vens uğursuzluğun başlıca səbəbləri kimi İranla gərginliyi, artan yaşayış xərclərini və İsraillə münasibətləri göstərib. O bildirib ki, məhz müharibə amili respublikaçıların ən azı altı il Senatda üstünlük əldə etməsinə əngəl törədib. Bununla belə, mövcud administrasiyanın üzvü olduğu üçün Vensin Trampdan tam məsafə saxlaması çətin görünür.

Florida qubernatoru Ron DeSantis isə özünü partiyanın təbii varisi elan edərək seçki nəticələrini böyük təhlükə kimi dəyərləndirib. Konqres və icra nümayəndələrinə birja ticarətinin qadağan olunmasını tələb edən DeSantis dolayısı ilə prezidentliyinin ilk ilində minlərlə birja əməliyyatı gerçəkləşdirən Trampı hədəf alıb.

Digər tərəfdən, senator Ted Kruz seçkidəki uğursuzluğu tarixi fiasko kimi səciyyələndirərək, bunu gömrük tariflərinə qarşı narazılıq, Yaxın Şərqdəki toqquşmalar və məlumat mərkəzlərinin nizamsız inşası ilə izah edib. Əvvəlki prezidentliyə namizəd Mitt Romni də Trampın tarif addımlarını, düşünülməmiş müharibə siyasətini və aşkar korrupsiyanı kəskin tənqid edən liderlər sırasında yer alıb.