Danimarkada dövlət maliyyə dəstəyinin azaldılmasına qarşı etirazlar olub

Danimarkada rəsmi qurumların şagird və tələbələrə dövlət tərəfindən göstərilən maliyyə dəstəyini azaltmaq planlarına qarşı kütləvi etiraz aksiyaları təşkil olunub. Noyabrın 4-də minlərlə gənc Kopenhagenin küçələrinə çıxaraq parlamentin yerləşdiyi Kristiansborq binasına doğru yürüş həyata keçirib.

Ölkənin müxtəlif bölgələrindən şagird və tələbələrin paytaxta gətirilməsi üçün 19 avtobus təşkil olunub. Bundan əlavə, Danimarkanın 50-dən çox gimnaziyasında təhsil alan təxminən 40 min şagird etiraz əlaməti olaraq dərslərə qatılmayıb.

Narazılığa səbəb hökumətin SU dövlət maliyyə dəstəyi sistemində dəyişiklik etmək planları olub. Təklifə əsasən, valideynləri ilə birlikdə yaşayan şagird və tələbələrin ailələrinin ümumi illik gəliri 710 min kronu (196 min dollar) keçərsə, onlar bu ödənişlərdən məhrum ola bilərlər. Ailənin illik gəliri 419 min kron ilə 710 min kron arasında olduqda isə müavinətin məbləğinin tədricən azaldılması nəzərdə tutulur.

Etirazçılar hesab edirlər ki, bu cür tədbirlər sosial bərabərsizliyi daha da artıracaq və gənclərin təhsil almaq imkanlarını məhdudlaşdıracaq. Onların fikrincə, maliyyə dəstəyi yalnız valideynlərin gəlirindən asılı olmamalıdır.

Danimarkadakı etiraz aksiyaları Fransada şagirdlərin oxşar nümayişləri fonunda baş tutub. Bununla belə, Kopenhagendəki aksiya dinc şəraitdə keçib.