Azərbaycanın Ukraynadakı səfiri Zakarpatye vilayəti ilə iqtisadi əlaqələri müzakirə edib

Azərbaycan Respublikasının Ukraynadakı fövqəladə və səlahiyyətli səfiri Seymur Mərdəliyev Zakarpatye vilayətinin iş adamları və biznes subyektlərinin təmsilçiləri ilə görüş keçirib. Görüş zamanı tərəflər arasında qarşılıqlı ticarət dövriyyəsinin və investisiya sahəsində əməkdaşlığın artırılması imkanları diqqət mərkəzində olub.

AzadAzərbaycan xəbər verir ki, diplomat bu barədə rəsmi "X" sosial şəbəkə hesabında məlumat paylaşıb. O bildirib ki, müzakirələr çərçivəsində Azərbaycan ilə Zakarpatye vilayətinin sahibkarları arasında birbaşa işgüzar münasibətlərin qurulması və möhkəmləndirilməsi məsələləri də nəzərdən keçirilib.

Səfir Seymur Mərdəliyev, həmçinin iki tərəf arasında iqtisadi tərəfdaşlığın daha da dərinləşdirilməsi üçün böyük potensialın olduğunu vurğulayıb.