Brüsseldə Birinci Qarabağ müharibəsi itkinlərinin ailələri aksiya keçirib

AzadAzərbaycan xəbər verir ki, Birinci Qarabağ müharibəsi zamanı itkin düşən şəxslərin yaxınları otuz ildən artıqdır ki, taleyi naməlum qalan minlərlə azərbaycanlının problemini dünya ictimaiyyətinin diqqətinə çatdırmaq məqsədilə Brüsseldə Avropa Parlamenti binasının qarşısında aksiya təşkil ediblər.

Aksiya "Qarabağ İtkin Ailələri" İctimai Birliyinin təşəbbüsü ilə baş tutub. Tədbir zamanı iştirakçılar itkin düşən vətəndaşlarımızın fotoşəkillərini, onların adından yazılmış rəmzi məktubları və şəxsi əşyalarını əks etdirən xüsusi instalyasiya nümayiş etdiriblər.

Tədbirdə səsləndirilən məlumata görə, Ermənistanın hərbi təcavüzü nəticəsində 4010 azərbaycanlı itkin düşüb. Onların arasında hərbçilərlə yanaşı, dinc sakinlər, o cümlədən uşaqlar, qadınlar və ahıllar da var.

Aksiya iştirakçıları işğaldan azad olunan ərazilərdə otuzdan çox kütləvi məzarlığın aşkarlandığını, bu günədək yüzlərlə şəxsin şəxsiyyətinin müəyyənləşdirilərək ailələrinə təhvil verildiyini xatırladıblar. Sonda Ermənistan tərəfi itkinlərin taleyinə və kütləvi məzarlıqların yerinə dair arxiv sənədlərini təqdim etməyə çağırılıb.